(ភ្នំពេញ)៖ ឯកឧត្តមនាយឧត្តមសេនីយ៍កិត្តិសង្គហបណ្ឌិត គន់ គីម អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ សូមសម្តែងនូវក្តីបារម្ភយ៉ាងខ្លាំង បន្ទាប់ពីទទួលបានដំណឹងថា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឧត្តមភរិយាដ៏ឧត្តុង្គឧត្តមរបស់ សម្តេចអគ្គមហាសេនាបតីតេជោ ហ៊ុន សែន បានដួលក្នុងបន្ទប់សម្រាក ហើយត្រូវបានបញ្ជូនមកពិនិត្យ និងព្យាបាលនៅមន្ទីរពេទ្យកាលម៉ែត។ ឯកឧត្តមនាយឧត្តមសេនីយ៍កិត្តិសង្គហបណ្ឌិត គន់ គីម សូមបួងសួងដល់គុណបុណ្យព្រះរតនត្រ័យ ទេវតាថែរក្សាទឹកដីនៃព្រះរាជាណាចក្រកម្ពុជា ព្រមទាំងវត្ថុស័ក្តិសិទ្ធិទាំងអស់ក្នុងលោក សូមព្រះអង្គតាមជួយបីបាច់ថែរក្សាការពារប្រោះព្រំនូវសព្ទ សាធុការពរជ័យគ្រប់ប្រការជូន សម្តេចកិត្តិព្រឹទ្ធបណ្ឌិត សូមទទួលបានសុខភាពល្អបរិបូរណ៍ កម្លាំងពលំមាំមួន ឆាប់បានជាសះស្បើយពីជំងឺ។ សម្តេចកិត្តិព្រឹទ្ធបណ្ឌិត ជានិច្ចកាលតែងតែប្រឹងប្រែង យកអស់កម្លាំងកាយចិត្ត និងប្រាជ្ញាស្មារតី ក្នុងនាមជាមាតាមនុស្សធម៌ ជួយដោះស្រាយទុក្ខលំបាក ជូនប្រជាពលរដ្ឋជួបគ្រោះមហន្តរាយ អ្នកទីទ័លក្រ អ្នកផ្ទុកមេរោគអេដស៍ ក្រុមជនងាយរងគ្រោះ ស្ត្រី កុមារ ជនពិការ ជនចាស់ជរាគ្មានទីពឹង ដែលស្ថិតក្នុងស្ថានភាពងាយរងគ្រោះបានទាន់ពេលវេលា ដោយមិនរើសអើង និងមិនទុកនរណាម្នាក់ចោល ព្រមទាំងរួម ចំណែកលើកស្ទួយសមភាពយេនឌ័រ និងការផ្តល់ភាពអង់អាចដល់ស្ត្រី និងក្មេងស្រីក្នុងសង្គម លើកកម្ពស់សីលធម៌ សង្គម និងតម្លៃស្ត្រី ដែលធ្វើឱ្យស្ត្រីកម្ពុជាមានឱកាស ចូលរួមគ្រប់សកម្មភាពសង្គម និងរួមចំណែកជាមួយរាជរដ្ឋាភិបាល ក្នុងការអភិវឌ្ឍប្រទេសជាតិឱ្យរីកចម្រើន ជារៀងដរាបមក។ សូម សម្តេចកិត្តិព្រឹទ្ធបណ្ឌិត និងសម្តេចអគ្គមហាសេនាបតីតេជោ ដែលជាឧត្តមស្វាមី ព្រមទាំងក្រុមគ្រួសារជាទីស្រឡាញ់ សូមបានប្រកបដោយព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

នៅគណៈកម្មាធិការជាតិគ្រប់គ្រងគ្រោះមហន្តរាយ ឯកឧត្តម កិត្តិសង្គហបណ្ឌិត គន់ គីម  ទេសរដ្ឋមន្ត្រី អនុប្រធានទី១ គ.ជ.គ.ម. បានអនុញ្ញាតឱ្យ លោក ចន អោយលីហ្វ (John Aylieff) នាយកប្រចាំ កម្មវិធីស្បៀងអាហារពិភពលោក នៃអង្គការសហប្រជាជាតិ ប្រចាំនៅអាស៊ី និងប៉ាស៊ីហ្វិក ចូលជួបសម្តែងការគួរសម នាព្រឹកថ្ងៃទី៣១ ខែមករា ឆ្នាំ២០២៤ក្នុងភាពជាដៃគូ លើការគ្រប់គ្រងហានិភ័យ គ្រោះមហន្តរាយនៅកម្ពុជា។  ក្នុងជំនួបពិភាក្សាការងារទ្វេភាគីនោះ បានរំលេចថា គឺជាការ ពង្រឹងកិច្ចសហប្រតិបត្តិការ ឱ្យកាន់តែរឹងមាំ និងស៊ីជម្រៅ រវាងគណៈកម្មាធិការជាតិគ្រប់គ្រងគ្រោះមហន្តរាយ និង កម្មវិធីស្បៀងអាហារពិភពលោក នៃអង្គការសហប្រជាជាតិ ដែលបានចាប់ផ្ដើមអនុវត្ត សកម្មភាពការងារនៅកម្ពុជា ចាប់តាំងពីឆ្នាំ១៩៩៥កន្លងមក ។ ឯកឧត្តម កិត្តិសង្គហបណ្ឌិត គន់ គីម  បានសម្តែងនូវការកោតសរសើខ្ពស់ចំពោះ កម្មវិធីស្បៀងអាហារពិភពលោក សម្រាប់កិច្ចសហប្រតិបត្តិការ និងការគាំទ្រដល់ គ.ជ.គ.ម. ទាំងផ្នែកធនធាន និងបច្ចេកទេស ក្នុងភាពជាដៃគូសហការល្អ បានធ្វើឱ្យសមត្ថភាព ក្នុងការគ្រប់គ្រងគ្រោះមហន្តរាយ របស់គណៈកម្មាធិការជាតិគ្រប់គ្រងគ្រោះមហន្តរាយ ទាំងនៅថ្នាក់ជាតិ និងថ្នាក់ក្រោមជាតិ មានការរីកចម្រើនគួរជាទីមោទនភាព។ ជាពិសេស ការអនុវត្តសកម្មភាព ដែលស្ថិតក្នុងកិច្ចព្រមព្រៀងកម្រិតយុទ្ធសាស្ត្រ រយៈពេល៥ឆ្នាំ ក្នុងភាពជាដៃគូ លើការគ្រប់គ្រងហានិភ័យ គ្រោះមហន្តរាយនៅកម្ពុជា។ អាទិភាពរបស់គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.) ក្នុងនាមជាអ្នកដឹកនាំ សម្របសម្រួលលើការងារគ្រប់គ្រងគ្រោះមហន្តរាយ រួមទាំងការឆ្លើយតប និងការត្រៀមរៀបចំ នៅកម្ពុជា ប្រកបដោយប្រសិទ្ធភាព។ វិស័យសំខាន់ៗមួយចំនួន រួមមានការសម្របសម្រួល ក្នុងចំណោមក្រសួងស្ថាប័ន ផ្នែកមនុស្សធម៌ ការគ្រប់គ្រងព័ត៌មាន ការវិភាគហានិភ័យអាកាសធាតុ និងប្រព័ន្ធប្រកាសព័ត៌មានឱ្យដឹងមុន។ធានាបានដល់ការអនុវត្តគោលនយោបាយ និងលទ្ធផលនៃការត្រួតពិនិត្យ ប្រកបដោយប្រសិទ្ធភាពខ្ពស់។  ឯកឧត្តម ទេសរដ្ឋមន្ត្រីជំនួសមុខសម្តេចធិបតី ហ៊ុន មាណែត ជានាយករដ្ឋមន្ត្រីជាប្រធានក្នុងនាមរាជរដ្ឋាភិបាលកម្ពុជា បាននឹងកំពុងបំពេញការងារបានយ៉ាងល្អក្នុងការគ្រប់គ្រងហានិភ័យគ្រោះមហន្តរាយ។ ជាពិសេស ការដឹកនាំសម្របសម្រួល និងអនុវត្ត កិច្ចសហប្រតិបត្តិការ ជាមួយដៃគូអភិវឌ្ឍន៍ អង្គការដៃគូ និងវិស័យឯកជន ដោយយល់ច្បាស់ថា ការគ្រប់គ្រគ្រោះមហន្តរាយ គឺជាការចូលរួមចំណែកពីវិស័យប្រទាក់ក្រឡា ក្នុងការបំពេញ ដើម្បីសុវត្ថិភាពប្រជាពលរដ្ឋ។ លោក ចន អាយលីហ្វ (John Aylieff) បានជម្រាបជូនថាកម្មវិធីស្បៀងអាហារពិភពលោក បានគាំទ្រទៅលើវិស័យការងាររបស់គណៈកម្មាធិការ ជាតិគ្រប់គ្រងគ្រោះមហន្តរាយកន្លងមកគឺធ្វើសកម្មភាពទាំងថ្នាក់ជាតិរហូតដល់ថ្នាក់ក្រោមជាតិផងដែរ។  លោកបានលើកឡើងបន្ថែមទៀតពីគោលបំណង និងការស្វែងយល់បន្ថែមទៀត អំពីកិច្ចសហប្រតិបត្តិការ រវាងកម្មវិធីស្បៀងអាហារពិភពលោក និងគណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម.)។ អាទិភាពរបស់កម្មវិធីស្បៀងអាហារពិភពលោក ដែលនឹងត្រូវចាប់ផ្តើមអនុវត្តផែនការយុទ្ធសាស្ត្រថ្មី របស់កម្មវិធីស្បៀងអាហារពិភពលោកសម្រាប់កម្ពុជា ឆ្នាំ២០២៤-២០២៨ នាពេលអនាគត។ គូសបញ្ជាក់ថា ការអនុវត្តក្របខ័ណ្ឌការងារសេនដាយ សម្រាប់ការកាត់បន្ថយហានិភ័យគ្រោះមហន្តរាយ ២០១៥-២០៣០ គ.ជ.គ.ម.មានផែនការសកម្មភាពជាតិសម្រាប់ការកាត់បន្ថយហានិភ័យគ្រោះមហន្តរាយ ឆ្នាំ២០២៤-២០២៨ និងកំពុងដំណើរការកសាង ដោយស្របតាមក្របខ័ណ្ឌការងារសេនដាយ សម្រាប់ការកាត់បន្ថយហានិភ័យគ្រោះមហន្តរាយ និងកម្មវិធីនយោបាយ របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ២០២៣-២០២៨។ ឯកសារផែនការសកម្មភាពជាតិនេះ គ្រោងនឹងបញ្ចប់ធ្វើការអនុម័ត និងចុះហត្ថលេខា ដោយ សម្តេចធិតីនាយករដ្ឋមន្ត្រី នៃព្រះរាជាណាចក្រកម្ពុជា នៅអំឡុងឆមាសទី២ នៃឆ្នាំ២០២៤ នេះ។

នៅព្រឹកថ្ងៃទី២២ ខែមករា ឆ្នាំ២០២៤ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១  គណៈកម្មាធិការជាតិគ្រប់គ្រងគ្រោះមហន្តរាយ   បានអញ្ជើញចុះទៅមន្ទីធនធានទឹក និងឧតុនិយមខេត្តបាត់ដំបង ដើម្បីស្តាប់របាយការណ៍ពីកិច្ចអន្តរាគមន៍ នឹងពិនិត្យមេីលម៉ាស៊ីនមូមទឹក  និងគ្រឿងចក្រ  សម្រាប់ធ្វើកិច្ចអន្តរាគមន៍បញ្ហាខ្វះទឹកបង្កបង្កើនផលស្រូវ។  តាមរបាយការណ៍របស់មន្ទីធនធានទឹក និងឧតុនិយម ជាមួយ មន្ទីរកសិកម្មខេត្ត បានឱ្យដឹងថាទូទាំងខេត្តបាត់ដំបង មានស្រុកមោងឬស្សីមួយប៉ុនណោះដែលកំពុងជួបប្រទះបញ្ហាខ្វះទឹក។ ក្នុងនោះស្រុកមោងឬស្សី មានស្រូវរងផលប៉ះពាល់  ដោយខ្វះខាតទឹក ចំនួន៤ឃុំ សរុបប្រមាណ៨០០០ហិចតា ។ ជាការឆ្លើយតប អាជ្ញាធរ ខេត្ត  ស្រុក  និងសមត្ថកិច្ច ជំនាញពាក់ព័ន្ធ បានជួយសង្គ្រោះបានប្រមាណ២០០០ហិកតាហើយ ដោយឡែក នៅឃុំខ្លះប៉ះពាល់ តិចតួច មន្ទីរធនធានទឹកនិងឧតុនិយម  និង មន្ទីរកសិកម្ម កំពុងសហការធ្វើការសង្គ្រោះជាបន្តបន្ទាប់។  ក្នុងឪកាសនោះដែរ ឯកឧត្តមក៏បានណែនាំឲ្យអាជ្ញាធរពាក់ព័ន្ធក្នុងខេត្តត្រូវពិចារណាឱ្យល្អិតល្អន់លើការរក្សាស្តុកទឹកទុកសម្រាប់មនុស្ស និងសត្វ ប្រើប្រាស់ប្រចាំថ្ងៃ នឹងត្រូវខិតខំយកចិត្តទុក្ខដាក់ឱ្យអស់ពីសមត្ថភាពដើម្បីធ្វើការដោះស្រាយបញ្ហាកង្វះទឹកជូនប្រជាកសិករដែលបានបង្កបង្កើនផលរួចហើយ។

(ភ្នំពេញ)៖ ឯកឧត្តម នាយឧត្តមសេនីយ៍កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានសមាគមអតីតយុទ្ធជនកម្ពុជា និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ សូមបួងសួងដល់វត្ថុស័ក្តិសិទ្ធិ ក្នុងលោកតាមជួយបីបាច់ថែរក្សា និងប្រសិទ្ធិពរជ័យសិរីមង្គល មហាប្រសើរជូនចំពោះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ក្នុងឱកាសចម្រើនជន្មាយុគម្រប់៤៣ ឈានចូល ៤៤ឆ្នាំ នៅថ្ងៃទី២២ ខែមករា ឆ្នាំ២០២៤។នាទិវាដ៏មហាមង្គលសួស្តីប្រពៃថ្លៃថ្លានេះ យើងខ្ញុំទាំងអស់គ្នា សូមបួងសួងដល់គុណបុណ្យព្រះរតនត្រ័យ កែវទាំងបី វត្ថុស័ក្តិសិទ្ធិទាំងឡាយក្នុងលោក ទេវតាថែរក្សាទឹកដីនៃព្រះរាជាណាចក្រកម្ពុជា សូមជួយប្រសិទ្ធពរជ័យបវរសួស្តី សិរីមង្គល វិបុលសុខ មហាប្រសើរគ្រប់ប្រការជូនលោកជំទាវបណ្ឌិត និងសម្ដេចមហាបវរធិបតី ព្រមទាំងបុត្រាបុត្រីជាទីស្រឡាញ់ សូមទទួលបានជោគជ័យលើគ្រប់ភារកិច្ច និងសូមបានប្រកបដោយពុទ្ធពរ និងពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

បន្ទាយមានជ័យ៖ ឯកឧត្តម នាយឧត្តមសេនីយ៍កិត្តិសង្គហបណ្ឌិត គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានធ្វើការជំរុញឲ្យស្ថាប័នពាក់ព័ន្ធទាំងអស់ត្រូវចេញបណ្ណក្រីក្រ បណ្ណហានិភ័យ និងចេញបណ្ណកម្មសិទ្ធិជូនដល់អតីតយុទ្ធជន គ្រួសារយុទ្ធជនពលី ពិការ គ្រួសារក្រីក្រពិតប្រាកដ។ ការជំរុញរបស់ឯកឧត្តម នាយឧត្តមសេនីយ៍កិត្តិសង្គហបណ្ឌិត គន់ គីម ក្នុងឱកាសអញ្ជើញជាអធិបតីក្នុងពិធីប្រកាសទទួលស្គាល់ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ជាប្រធានសមាគមអតីតយុទ្ធជនកម្ពុជាខេត្ត នៅរសៀលថ្ងៃទី២១ ខែមករា ឆ្នាំ២០២៣ ម្សិលមិញនេះ នៅស្នងការដ្ឋាននគរបាលខេត្តបន្ទាយមានជ័យ។ ឯកឧត្តម នាយឧត្តមសេនីយ៍ ថ្លែងថា អង្គភាពដែលមានការពាក់ព័ន្ធទាំងអស់ត្រូវធ្វើបច្ចុប្បន្នភាពជាមួយក្រុមគ្រួសារយុទ្ធជនពលី ក៏ដូចជា អតីតយុទ្ធជន និងគ្រួសារប្រជាពលរដ្ឋក្រីក្រពិតប្រាកដ។ ក្នុងនោះ ត្រូវមានអត្តសញ្ញាណប័ណ្ណត្រឹមត្រូវតាមលក្ខខណ្ឌ ដើម្បីស្នើទៅក្រសួងពាក់ព័ន្ធចេញប័ណ្ណកម្មសិទ្ធិជូនពួកគាត់ជៀសវាងលក់ដូរ ឬយកទៅបញ្ចាំធ្វើឲ្យបាត់បង់កេរ្តិ៍ដំណែលរបស់សម្ដេចតេជោ បើមានការខ្វះខាតសមាគម ឬមន្ទីរជុំវិញខេត្តត្រូវជួយដល់អ្នករងគ្រោះពិតប្រាកដ ដើម្បីដោះស្រាយជូនពួកគាត់។ លើសពីនេះ ឯកឧត្តម នាយឧត្តមសេនីយ៍ បន្តថា តាមរយៈការលំបាកខាងលើមេភូមិ មេឃុំ ត្រូវតែជួយដោះស្រាយជាបន្ទាន់ទៅតាមលទ្ធភាពដែលមានព្រមទាំងត្រូវរាយការណ៍ទៅសាខាកាកបាទក្រហមខេត្ត ស្រុកថ្នាក់ដឹកនាំខេត្ត ដើម្បីជួយដោះស្រាយ និងអន្តរាគមន៍។ ឯកឧត្តម នាយឧត្តមសេនីយ៍ បន្ថែមថា ក្រុមប្រឹក្សាឃុំត្រូវប្រជុំគ្នាដើម្បីទុកថវិកាឃុំ-សង្កាត់ខ្លះសម្រួលដោះស្រាយនៅពេលជួបគ្រោះមហន្តរាយបើខ្វះខាតត្រូវសុំសប្បុរសជនបន្ថែមទៀត។ ក្រៅពីនេះមន្ទីរអង្គភាពនានាជុំវិញខេត្តត្រូវជ្រើសរើសរកពូជដំណាំគ្រប់ប្រភេទដើម្បីឲ្យប្រជាពលរដ្ឋធ្វើការដាំដុះទៅតាមលទ្ធភាព ក្នុងការថែទាំភូមិមួយផលិតផលមួយទោះបីពួកគាត់ចេញទៅរកស៊ីនៅខាងក្រៅក៏ដោយក៏ដំណាំទាំងនោះបានផ្ដល់ផលអោយពួកគាត់យកទៅលក់ ដើម្បីដោះស្រាយជីវភាពគ្រួសារផងដែរ៕  

(ពោធិ៍សាត់)៖ នាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន សមាគមអតីតយុទ្ធជនកម្ពុជា និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ នាព្រឹកថ្ងៃទី២១ ខែមករា ឆ្នាំ២០២៤ បានអញ្ជើញជាអធិបតី ក្នុងពិធីប្រកាសទទួលស្គាល់ លោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ ជាប្រធានគណៈកម្មាធិការ និងជាប្រធានគណៈអចិន្ត្រៃយ៍ នៃគណៈកម្មាធិការ សមាគមអតីតយុទ្ធជនកម្ពុជា ខេត្តពោធិ៍សាត់ តាមការចាំបាច់របស់គណៈអចិន្ត្រៃយ៍ នៃគណៈកម្មាធិការកណ្ដាល សមាគមអតីតយុទ្ធជនកម្ពុជា។ ពិធីនេះ ត្រូវបានធ្វើឡើងនៅសាលប្រជុំសាលាខេត្តពោធិ៍សាត់ ដោយមានការចូលរួមពី លោក ខូយ រីដា អភិបាលខេត្ត និងជាប្រធានកិត្តិយស សមាគមអតីតយុទ្ធជនកម្ពុជាខេត្ត អភិបាលរងខេត្ត ថ្នាក់ដឹកនាំមន្ទីរអង្គភាព ស្នងការ ស្នងការរង មេបញ្ជាការកងរាជអាវុធហត្ថខេត្ត មេបញ្ជាការតំបន់ប្រតិបត្តការសឹករងខេត្ត អភិបាលក្រុងស្រុក អធិការក្រុងស្រុក និងនាយប៉ុស្តិ៍នគរបាលរដ្ឋបាល ទាំង៤៩ឃុំសង្កាត់។ បន្ទាប់ពីពិធីប្រគល់សេចក្ដីសម្រេចនោះរួចមក, លោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ ជាប្រធានគណៈកម្មាធិការ និងជាប្រធានគណៈអចិន្ត្រៃយ៍ នៃគណៈកម្មាធិការ សមាគមអតីតយុទ្ធជនកម្ពុជា ខេត្តពោធិ៍សាត់ ដែលទើបតែងតាំងថ្មី បានឡើងប្ដេជ្ញាចិត្ត ស្មោះត្រង់ចំពោះជាតិ សាសនា ព្រះមហាក្សត្រ និងរាជរដ្ឋាភិបាល ដែលកើតចេញពីការបោះឆ្នោតស្របច្បាប់។ ជាមួយគ្នានោះ លោកសូមប្ដេជ្ញាអនុវត្តឲ្យបានម៉ឺងម៉ាត់ នូវច្បាប់រដ្ឋធម្មនុញ្ញ, គាំទ្រ និងអនុវត្តនូវគោលនយោបាយ យុទ្ធសាសបញ្ចកោណ របស់រាជរដ្ឋាភិបាល ដែលមានសម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ អនុវត្តអនុសាសន៍ទាំង១៤ចំណុច ក្នុងឱកាសបិទមហាសន្និបាត តំណាងសមាគមអតីតយុទ្ធជនកម្ពុជា ទូទាំងប្រទេស លើកទី២។ ប្ដេជ្ញាគោរពបទបញ្ជា លក្ខន្តិកៈ សេចក្ដីសម្រេច សេចក្ដីណែនាំរបស់សមាគម ដែលមានសម្ដេចតេជោ ជាប្រធានសមាគមអតីតយុទ្ធជនកម្ពុជា។ សហការជាមួយមន្ទីររៀបចំដែនដី នគរូបនីយកម្ម សំណង់ និងសុរិយោដី និងក្រសួងសង្គមកិច្ច អតីតយុទ្ធជន និងយុវនីតិសម្បទា ជម្រុញការដោះស្រាយសម្បទានដីសង្គមកិច្ច ដើម្បីបែងចែងជូនអតីតយុទ្ធជនក្រីក្រ គ្មានដីបង្កបង្កើនផលពិតប្រាកដ។ បំផុសចលនាប្រលងប្រណាំង៣ពូកែ របស់ អ.ស.ក នៅគ្រប់ថ្នាក់, រកឲ្យឃើញអតីតយុទ្ធជនមានស្នាដៃ ដើម្បីលើកសរសើរផ្សព្វផ្សាយធ្វើជាគំរូនិងជូនរង្វាន់។ ខិតខំអំពាវនាវរកសប្បុរសជន អាជីវករ ក្រុមហ៊ុន និងអង្គការផ្សេងៗ ដើម្បីគៀងគររកមូលនិធិជួយទ្រទ្រង់សមាគម និងជួយសាងសង់ផ្ទះជូនសមាជិកដែលខ្វះទីជម្រក។ បន្តជម្រុញការងារសម្ព័ន្ធមេត្រីភាព រវាងមន្ទីរអង្គភាពជុំវិញខេត្ត ជាមួយអតីតយុទ្ធជន។ លោក ខូយ រីដា អភិបាលខេត្ត និងជាប្រធានកិត្តិយស សមាគមអតីតយុទ្ធជនកម្ពុជា ខេត្តពោធិ៍សាត់ និងនាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន សមាគមអតីតយុទ្ធជនកម្ពុជា និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍ស្រដៀងៗគ្នាថា ការផ្លាស់ប្ដូរប្រធានសមាគមអតីតយុទ្ធជនកម្ពុជា ខេត្តពោធិ៍សាត់ នាពេលនេះ ទី១-ដោយសារលោកឧត្តមសេនីយ៍ទោ ប៉ែន ណាវណ្ណ បានក្លាយទៅជាអនុរដ្ឋលេខាធិការ ក្រសួងការពារជាតិ ទី២-នៅយោធភូមិភាគទី៥ នឹងធ្វើការដោះដូរកងទ័ព ទៅឲ្យនគរបាល ដោយសារនគរបាល មានបុស្ដិរដ្ឋបាលនៅថ្នាក់ ឃុំ សង្កាត់ ហើយមានអធិការដ្ឋាននគរបាលនៅតាមស្រុក និងនៅខេត្ត មានស្នងការដឹកនាំផ្ទាល់។ ដូច្នេះហើយ ដើម្បីកុំឲ្យបញ្ជាខ្សែបណ្ដោយ‑ទទឹងពិបាក ទើបប្រគល់ភារកិច្ចឲ្យស្នងការនគរបាលខេត្ត ធ្វើជាប្រធានសមាគមអតីតយុទ្ធជនតែម្ដង។ ថ្នាក់ដឹកនាំទាំង២ បានគាំទ្រយ៉ាងពេញទំហឹង ចំពោះបេសកកម្មការងាររបស់សមាគម និងខិតខំជួយជម្រុញចលនាសមាគម ឲ្យដំណើរការបានកាន់តែប្រសើរឡើង ដើម្បីចូលរួមលើកកម្ពស់តួនាទីរបស់អតីតយុទ្ធជន។ ក្នុងថ្ងៃដដែលនោះ ប្រតិភូដឹកនាំដោយ នាយឧត្តមសេនីយ៍ កិត្តិសង្គហបណ្ឌិត គន់ គីម ក៏បានបន្តចុះពិនិត្យ ទីតាំងស្ថាបនាទំនប់ច្រាំងស្ទឹងការពារទឹកជំនន់ ស្ថិតក្នុងភូមិស្វាយចាន់ ឃុំស្វាយលួង ស្រុកកណ្តៀង ខេត្តពោធិ៍សាត់ ដែលកន្លងមកមានការបាក់ស្រុត ជាអំណោយដ៏ថ្លៃថ្លា របស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា៕

(ភ្នំពេញ)៖ ឯកឧត្តម នាយឧត្តមសេនីយ៍កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានសមាគមអតីតយុទ្ធជនកម្ពុជា និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានផ្ញើសារចូលរួមរំលែកទុក្ខចំពោះមរណភាព ឧបាសិកា ឡុង សារ៉ាត់ ដែលត្រូវជាម្តាយបង្កើតរបស់ឯកឧត្តម បណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុក រដ្ឋលេខាធិការដ្ឋានអាកាសចរណ៍ស៊ីវិល។ យើងខ្ញុំមានសេចក្ដីក្តុកក្តួលសោកស្តាយជាអនេក ដោយបានទទួលដំណឹងដ៏សែនក្រៀមក្រំ អំពីមរណភាពរបស់ឧបាសិកា ឡុង សារ៉ាត់ នៅថ្ងៃសុក្រ ៩កើត ខែបុស្ស ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៩ ខែមករា ឆ្នាំ២០២៤ វេលាម៉ោង៨:៤៤នាទីយប់ ក្នុងជន្មាយុ៩០ឆ្នាំ ដោយជរាពាធ។ មរណភាពរបស់ ឧបាសិកា ឡុង សារ៉ាត់ គឺជាការបាត់បង់នូវម្តាយ ម្តាយក្មេក និងជីដូនជាទីគោរពស្រលាញ់ ប្រកបដោយព្រហ្មវិហារធម៌ ដែលបានខិតខំប្រឹងប្រែងពុះពារគ្រប់ឧបសគ្គចិញ្ចឹម បីបាច់ថែរក្សា និងអប់រំណែនាំផ្ដល់ដំបូន្មានធ្វើឲ្យកូន-ចៅបានក្លាយជាបញ្ញវន្ត និងជាថ្នាក់ដឹកនាំដែលមានស្នាដៃ ក្នុងការចូលរួមចំណែកអភិវឌ្ឍសង្គមជាតិ។ ម្យ៉ាងវិញទៀតមរណភាពរបស់ ឧបាសិកា ឡុង សារ៉ាត់ ក៏ជាការបាត់បង់នូវពុទ្ធសាសនិក ដ៏គំរូដែលតែងតែជួយគាំទ្រដល់ការកសាងហេដ្ឋារចនាសម្ព័ន្ធនានា ទាំងផ្នែកពុទ្ធចក្រ និងអាណាចក្រ សម្រាប់ទុកជាប្រយោជន៍ដល់ប្រជាពលរដ្ឋទូទៅ និងសង្គមជាតិ។ ស្ថិតក្នុងពេលវេលាដ៏ក្រៀមក្រំសោកសង្រេងនេះ យើងខ្ញុំសូមចូលរួមសម្ដែងនូវសមានទុក្ខដោយក្តីសោកស្តាយអាឡោះអាល័យ និងសូមបួងសួងឧទ្ទិសដល់ គុណបុណ្យព្រះរតនត្រ័យជួយយិតយោងដួងវិញ្ញាណក្ខន្ធរបស់ ឧបាសិកា ឡុង សារ៉ាត់ សូមឆាប់បានយោនយកកំណើតចាប់បដិសន្ធិ ក្នុងសុគតិភពកុំបីឃ្លៀងឃ្លាតឡើយ៕

រាជធានីភ្នំពេញ៖ នារសៀល ថ្ងៃសុក្រ ៩ កើត ខែបុស្ស ឆ្នាំថោះបញ្ចស័ក ពុទ្ធសករាជ ២៥៦៧ត្រូវនឹងថ្ងៃទី១៩ ខែមករា ឆ្នាំ២០២៤ នេះ, ឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្ត្រីអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានអនុញ្ញាតឱ្យ ឯកឧត្តម បណ្ឌិត CHERDKIAT ATTHAKOR (ឆឺតគៀត អាត់ថាកន) ឯកអគ្គរាជទូតនៃព្រះរាជាណាចក្រថៃប្រចាំកម្ពុជា ចូលជួបសម្តែងការគួរសម និងពិភាក្សាការងារ។  ជាកិច្ចចាប់ផ្ដើម ឯកឧត្តម កិត្តិសង្គហបណ្ឌិត បានសម្តែងនូវការស្វាគមន៍ និងក្ដីសោមនស្សរីករាយដែលបានជួបពិភាក្សាការងារជាមួយឯកអគ្គរាជទូត និងបានកោតសរសើរ និងថ្លែងអំណរគុណចំពោះការគាំទ្រ ក៏ដូចជាការសហការជួយសង្គ្រោះគ្រោះអគ្គីភ័យរបស់កងកម្លាំងសង្គ្រោះរបស់ប្រទេសថៃនៅព្រំដែន នាពេលកន្លងមក។ ឯកឧត្តម ឯកអគ្គរាជទូត បានថ្លែងអំណរគុណចំពោះ ឯកឧត្តម កិត្តិសង្គហបណ្ឌិត ដែលបានឆ្លៀតពេលវេលាដ៏មមាញឹកអនុញ្ញាតឱ្យរូបលោកបានចូលជួបសម្តែងការគួរសមនាឱកាសនេះ ហើយ ឯកអគ្គរដ្ឋទូត បានកោតសរសើរចំពោះកិច្ចសហប្រតិបត្តិការល្អរវាងកងប្រតិបត្តការសង្រ្គោះនៃប្រទេសទាំងពី។  គួរបញ្ជាក់ផងដែរថា កិច្ចពិភាក្សានៅក្នុងជំនួបនេះផ្តោតសំខាន់លើការពង្រឹងកិច្ចសហប្រតិបត្តិការលើវិស័យគ្រប់គ្រងគ្រោះមហន្តរាយ រវាងព្រះរាជាណាចក្រកម្ពុជា និងព្រះរាជាណាចក្រថៃ។ ទន្ទឹមនឹងនេះ ឯកឧត្តម កិត្តិសង្គហបណ្ឌិត និង ឯកឧត្តមឯកអគ្គរាជទូត ក៏បានពិភាក្សាគ្នាអំពីអនុស្សរណៈនៃការយោគយល់រវាងក្រសួងមហាផ្ទៃ នៃព្រះរាជាណាចក្រថៃនិង គណៈកម្មាធិការជាតិគ្រប់គ្រងគ្រោះមហន្តរាយ នៃព្រះរាជាណាចក្រកម្ពុជា ស្តីពីកិច្ចសហប្រតិបត្តិការ លើវិស័យនៃការកាត់បន្ថយហានិភ័យគ្រោះមហន្តរាយ និងការឆ្លើយតបគ្រោះអាសន្ន រវាងប្រទេសទាំងពីផងដែរ។

នៅគណៈកម្មាធិការជាតិគ្រប់គ្រងគ្រោះមហន្តរាយ នាព្រឹកថ្ងៃទី១៩ ខែមករា ឆ្នាំ២០២៤ ឯកឧត្តម ហង្ស សាមឿន អនុប្រធានទី២ គ.ជ.គ.ម. និងជា ទីប្រឹក្សាផ្ទាល់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីកម្ពុជា តំណាងដ៏ខ្ពង់ខ្ពស់ ឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានទទួលជួបសម្ដែងការគួរសម និងពិភាក្សាការងារ ជាមួយលោក Macro Toscan-Rivalta ប្រធានការិយាល័យប្រចាំតំបន់ (UNDRR) សម្រាប់អាស៊ីប៉ាស៊ីហ្វិក។ ក្នុងជំនួបនោះឯកឧត្តមបណ្ឌិត ហង្ស សាមឿន បានសម្តែងនូវការស្វាគមន៍ និងគោតសរសើរដែលកន្លងមកការិយាល័យប្រចាំតំបន់ (UNDRR) សម្រាប់អាស៊ីប៉ាស៊ីហ្វិក មានទំនាក់ទំនងយ៉ាងជិតស្និតលើការងារគ្រោះមហន្តរាយនៅកម្ពុជា ហើយនេះជាដើមឆ្នាំ២០២៤ ដែលបានជួបពិភាក្សាជាមួយលោក Macro Toscan-Rivalta និងសហការី មកពិភាក្សានិងលើកទិសដៅផែនការបន្ត ដើម្បីអនុវត្តន៏ ក្នុងវិស័យការងារគ្រប់គ្រងគ្រោះមហន្តរាយនិងឆ្លើយតបអោយទាន់ពេលវេលា។ឯកឧត្តម បានបញ្ជាក់ផងដែរថា ប្រព័ន្ធប្រកាសព័ត៌មានឱ្យដឹងមុន វាពិតជាមានសារៈសំខាន់ ដែលមិនអាចខ្វះបាន ជាពិសេស ការពង្រឹងភាពជាដៃគូជាមួយ ភាគីអ្នកពាក់ព័ន្ធ ដើម្បីបង្កើនប្រសិទ្ធភាពខ្ពស់ ក្នុងការគ្រប់គ្រងគ្រោះមហន្តរាយ និងប្រព័ន្ធប្រកាស ព័ត៌មានឱ្យដឹងមុន របស់យើងនៅកម្ពុជា ដែលជាចំណែកដ៏មានសារៈសំខាន់បំផុត ក្នុងការការពារ អាយុជីវិតរបស់ប្រជាពលរដ្ឋ ឱ្យរួចចាកផុតពីគ្រោះមហន្តរាយ និងរួមចំណែកដល់រាជរដ្ឋាភិបាល ក្នុងការកាត់បន្ថយភាពក្រីក្រ។ ក្នុងនាមរាជរដ្ឋាភិបាល និងក្នុងនាម សម្តេច បវធិបតី ហ៊ុន ម៉ាណែត ប្រធានគណៈកម្មាធិការជាតិគ្រប់គ្រងគ្រោះមហន្តរាយនិង ឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្ដ្រីជាអនុប្រធានទី១ បាន លើកឡើងថាគណៈកម្មាធិការជាតិគ្រប់គ្រងគ្រោះមហន្តរាយ បានធ្វើការ យ៉ាងសកម្មក្នុងការធ្វើសមាហរណកម្ម ការកាត់បន្ថយហានិភ័យគ្រោះមហន្តរាយ ទៅក្នុងផែនការ អភិវឌ្ឍន៍ និងស្របតាមផែនការយុទ្ធសាស្ត្រអភិវឌ្ឍន៍ជាតិ ជាពិសេស បាននឹងកំពុងរៀបចំផែនការ សកម្មភាពជាតិ សម្រាប់ការកាត់បន្ថយហានិភ័យគ្រោះមហន្តរាយ (NAP-DRR) ២០២៤-២០២៨ ដោយទទួលស្គាល់ពីសារៈសំខាន់នៃការការពារប្រជាជន និងហេដ្ឋារចនាសម្ព័ន្ធរបស់យើងពីផលប៉ះ ពាល់ដោយគ្រោះមហន្តរាយ។   ឯកឧត្តម បានបន្តថាកិច្ចសហការ និងភាពជាដៃគូ គឺជាគន្លឹះនៃភាពជោគជ័យរួម ក្នុងការគ្រប់គ្រងហានិភ័យ គ្រោះមហន្តរាយ។ ជាមួយគ្នានេះការអនុវត្តគម្រោង និងគំនិតផ្តួចផ្តើមរួមគ្នា ដែលអាចពង្រឹងកិច្ចខិតខំប្រឹងប្រែងក្នុងការគ្រប់គ្រងហានិភ័យគ្រោះមហន្តរាយ ជាពិសេស ដើម្បី ស្វែងរកការគាំទ្រជាបន្តបន្ទាប់ពីដៃគូអភិវឌ្ឍន៍ ម្ចាស់ជំនួយក្នុងការអនុវត្តកម្មវិធី ប្រកាសព័ត៌មានឱ្យ ដឹងមុនសម្រាប់ទាំងអស់គ្នា នៅកម្ពុជា ដែលនឹងរួមចំណែកយ៉ាងសំខាន់ដល់សមត្ថភាព ត្រៀមរៀបចំ និងឆ្លើយតបគ្រោះមហន្តរាយ ។ ក្នុងឱកាសនៃជំនួប លោក Macro Toscan-Rivalta បានសម្ដែងនូវក្ដីសោមនស្សរីករាយ និងអរគុណ ដែលបានជួបពិភាក្សាការងារ នៅពេលនេះ និងបានវាយតម្លៃខ្ពស់ចំពោះកិច្ចសហការគាំទ្រកន្លងមក របស់ គណៈកម្មាធិការជាតិគ្រប់គ្រងគ្រោះមហន្តរាយ ដែលបានរួមចំណែកដល់ការកាត់បន្ថយគ្រោះមហន្តរាយ របស់ប្រទេសកម្ពុជា លោកក៏បានជម្រាបជូនផងដែរថា UNDRR នឹងបន្ដសហការគាំទ្រ ចំពោះការអនុវត្តគម្រោងប្រកាសព័ត៌មានឱ្យ ដឹងមុនសម្រាប់ទាំងអស់គ្នា ដ៏មានសារៈសំខាន់នេះ។ ឯកឧត្តម បានថ្លែងអំណរគុណ ចំពោះភាពជាដៃគូ របស់អង្គការសហប្រជាជាតិដែលកំពុងបន្ត និងការគាំទ្រដល់កម្ពុជា ក្នុងការអភិវឌ្ឍ និងការគ្រប់គ្រងហានិភ័យគ្រោះមហន្តរាយនៅព្រះរាជាណាចក្រកម្ពុជា។

ឧត្តរមានជ័យ ថ្ងៃទី១៥ ខែមករា ឆ្នាំ២០២៤ ពិធីជួបសំណេះសំណាលជាមួយសមាជិក សមាជិកា ក្រុមប្រឹក្សាឃុំ សង្កាត់ ក្នុងមុខតំណែងដែលជាអង្គបោះឆ្នោតអសកល ជ្រើសតាំងសមាជិកព្រឹទ្ធសភានិតិកាលទី៥ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់ ឯកឧត្ដមកិត្តិសង្គហបណ្ឌិត គន់ គីម សមាជិកអចិន្ត្រៃយ៍គណៈកម្មាធិការកណ្តាល ជាប្រធានក្រុមការងារចុះជួយខេត្តឧត្តរមានជ័យ។